ها باش بلاني الله للكاتب حكيم البورشدي

هَا بَاشْ بْلَانِي الله

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
النَيَّة صَافْيَة وَ سْلِيمَة
وَالذْبِيحَة بْهِيمَة
خَطِّيتْ العَتْبَة بْرَجْلِي
گَالُو رْضَاكْ مَنْ الله
وَ رْضَى المِّيمَة غَطَّاكْ
وَ دْعَاوِيهَا
حَاضْرَة مْعَاكْ
سَبَّقْ لِيمْنَة
دِيرْ النَيَّة وْ اسَمِّي
تْوَكَّلْتْ عَاللَّه
اعْطِيتْهُمْ اشْطَايْطِي
وَ دْرَابْلِي القْدِيمَة
ارْمِيتْ الفْتُوحْ
اتْبَرَّكْتْ بِسْيَادْ القُبَّة
وَ اجْوَادْ الشْرِيفَة
گَالُو حَاجَّة وَ حْكِيمَة

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
بْغِيتْ
نَتَّضْرَبْ كَارْطَة
وَلَّا نَطَّرْدَگْ لْدُونْ
يْبَرُّي جْلَالَة وَ ذْنُوبْ
يَرْخَفْ الگَلْبْ المَشْحُونْ
يْبَيَّنْ العْكَسْ فِينْ تْرَشْ
و لا شْكُونْ خَلَّا
حْجَرْ القَابْلَة مَسْنُونْ
بْغِيتْهُمْ يْبَانُو
وَسْطْ الحْرُوفْ
يَتْمَسْخُو سُوطَة
وَلَّا بْغَلْ سْيُوفْ
بْغِيتْ نَقْرَاهُمْ فِالفَالْ
وَلَّا نْشُوفْهُمْ غُوفَالَة
فْرَاسْ لِيتِيمْ وَلَّا بُوهَالِي
حْزَمْ سْوَالَفْهَا هْبَالْ

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
بْغِيتْ نَتَّقْرَا
هْمُومْ فِي الكَفْ
نَتْهَزْ ثْقَافْ
وَلَّا دْيَارْ فِخْطُوطْ
تَنْطَقْ لَسْيَادْ
وَ تْجُودْ بِكْلِيمَة
تْصَفِّي الغَمَّة
مَنْ النَّاسْ بْلَا دَوَّازْ
مَا تْخَلِّي سْمَانَا ظْلِيمَة
وَ تْگُولْ لِينَا بْلَا خُوفْ
شْكُونْ فِيهُمْ دَّاوْ
وَلَّا فِينْ دَفْنُو الغْنِيمَة ،،

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
بْغِيتْ انْگَرْ و نَتَّقْرَا
فِالحْرُوفْ
بْلَا نْكِيرْ وَلَّا حْلُوفْ
بْلَا بِيعَة وَلَّا شْكِيمَة
نَتْگَرَّعْ مَنْ الجُوفْ
وَ نْگُولْ زِيدُونَا
غِيرْ دْغِيمَة
تْسَرَّحْ فِينَا العْرُوقْ
دَهْنُونَا بِشْحِيمَة
وَلَّا بَخُّونَا فِجْغِيمَة
تْزَوَّلْ المْرَارْ وَ طَّفِي
نَارْ الغْيَارْ
يَتْرَدُّو تُوكَالْ
يْخُرْجُو بِينْ خْيُوطُو
سْبَاوَة
وَ يَتَّجْلَاوْ غْشَاوَة
مَنْ العِينْ
بِمَرْوَدْ يْكَحَّلْهَا نْقَاوَة

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
هَا سَعْدِي هَا وَعْدِي
لَا غْمَامَة تْلُوحْ
وْ لَا سْمَاهُمْ تْنَدِّي
لَا نْخَلْهُمْ يَعْطِي بْلُوحْ
لَا زْهَرْ عَنْدِي
غرونا بيعونا
الكْذُوبْ
گَالُو بَلْدِي
اللِّي تْمَعْمَعْ
يْگُولُو سَرْدِي
عَمْرَتْ الزْرِيبَة بِهُمْ
جَبْرُوا الهَمْ بِالهْدَمْ
خَلَّاوْ اللْسَانْ
بِحْرُوفْ السَّاكَتْ
يَغْزَلْ قْصَايْدْ وَ يَنْظَمْ
وَلَّا وَاحَدْ فِيهُمْ
اتَّقَى الله فِينَا وَلَّا احْشَمْ

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
وَاشٍ حْلَالْ
وَلَّا حْرَامْ
يْمَنْعُوا فِينَا الشُوفَة
و يْسَدُّوا بَابْ لَكْلَامْ
يْگُولُو كَلْمَة
و يْتَّلْوَى فِيهُمْ اللْسَانْ
يْوَصْفُونَا عَشْبَة
وَلَّا عْرَى يْهَيَّجْ الغْرَامْ
هَا عَارْ جَدِّي
وَ تْرَابْ الشِّيخْ
اللِّي تْهَزْ بِالعَرَّامْ
دَاوَى عْدُوَة وَ جْذَامْ
وَ قَطْرَاتْ الزَّاوْيَة
اللِّي اسْگينَا مَنْ البِيرْ
غَسْلَتْ تَابْعَة وَ دْيَارْ
مَا نْفَعْ فِيكُمْ وَلَّا اشْفَعْ فِينَا
وَ ارْخَفْ عُگْدَة الحْزَامْ
مَا طْلَقْ سْرَاحْ الخَطْوَة
وَلَّا گَرْ فِيكُمْ صْيَامْ
وَلَّا مَلْحْ الطْعَامْ
مَا جْلَاتْكُمْ الجْرِيحَة
وَلَّا رْيَاحْ
مَنْ هْيَاجْهَا خَيَّمْ الغْمَامْ
وَلَّا سْتَرْكُمْ عْجَاجْهَا
فْقُنْتْ الظْلَامْ
هَا عَارْ جَدِّي
وَ زْغِيبَاتْ مَنْ شَعْرِي
إِلَى مَا خَرْجُو مَنْ جَنْبِي
گْبَلْ مَا صَبْرِي
يْصَدِّي
وَ تْلَاحُو بْرُودَة
مَنْ ظَهْرِي

هَا قَلْبِي هَا تَخْمَامِي
هَابَاشْ يْآتِينِي الله
هَا صَبْرِي هَا تَحْزَابِي
هَا بَاشْ بْلَانِي الله
غِيرْ الفْرَانْكِيَة
وْ قَبَابْ سِيدِي اعْمَارَة
دَارُو جُوقَة بْلَا تْمَارَة
خْوَاوْ الشْكَارَة بِالشْطَارَة
خَلَّاوْنَا عْلَى بَابْ الله

هَا بَاشْ بْلَانِي الله
بقلم حكيم البورشدي